معلومات العضو

عمران عامر عضو فضي

إحصائية الترشيح

عدد النقاط : 136

 

 

الأخت رياح الشمال سلامات مرة ثانية

نحن بني البشر لما نبدأ في الهجرة بنكون قد حصلنا درجة من الاحباط صعب معها مواصلة العيش أو القعاد في منطقتنا بالتالي بتكون هجرة أبدية من غير خط رجعة كأن الرجوع للخلف اصبح معدوم عندنا أو كأننا صممنا للمضي قدما للامام دون الرجوع الى الخلف زي الطائرة ما بعرف اذا كانت الطائرة عندها خلف ولا لا لكن طوال عمري ما شفت لي طائرة راجعة خلف الا يكون جارينها بتراكتور والله أعلم .

بالتالي لما نطلع بنطلع حتى نعشنا ذاتوا ما بيرجع للبلد وحيث ما وطئت اقدامنا صار لنا المحل وطن وقرية كالتي بعدنا عنها ، أجيك من ناحية أخرى البشر بطبيعة حالهم الحاجة البتكون أمامهم ما بقدرّوا قيمتها وبتكون نظرتهم ليها نظرة عابرة من غير تعمق يعني المساءلة دي بتكون متبادلة حسيا بن الولد والبنت بصفة خاصة عشان كده البنت البتقدم ليها ولد بالقرية ظل فيها وهي طلعت منها ما بتوافق بيه لانها نظرت لمجتمع آخر واختلت عندها الموازين الحياتية وكذا الحال بالنسبة للود الذي ذهب من القرية ايضا وهاجر لو أهله قالوا ليه عرس بنت فلان تقوم القيامة وما تهدأ الأمور ابدا وتحصل القطيعة والجفوة ودي بالمناسبة أمثال حية للعيان.

بالتالي بتكون في هجرة مقصودة الأهداف والنيات وغالبها بيكون أنا بمشي عشان أكون زي فلان أو انا بمشي عشان أكون زي فلانة ديك ونحن في ظل تفكيرنا الأناني هذا والذاتي البحت بننسى في غمرة هذه التحولات أهم عنصرين وهما الأب والأم وكذلك الأرض وملكيتنا لها بالتالي بتحصل الجفوة وبتكون الهجرة عكسية مئة بالمئة .

سألتني عن أنه الانسان ما ممكن يكون ذاته في مدينته بقول ليك دي نظرة نحن لسه بعاد عنها كل البعد ودي درجة تنطوي تحت حديث الرسول الكريم " ص" (خيركم خيركم لاهله وأنا خيركم لاهلي) ، فهل نحن حصلنا هذه الدرجة ؟ طبعا نحن اذا حصلنا معني الحديث ده بكل حذافيره بنكون وصلنا درجة الكمال وده طبعا أول المستحيلات لاننا بشر وخلقنا بطبائع البشر المتنافرة والتي لا يرضيها العجب ولا الصيام في رجب كما يقولون عشان كده بيصعب الأمر الذي ذكرتيه وتبقى هنا المصيبة الاكبر ونكون لا طلنا بلح الشام و لاعنب اليمن ونكون فقدنا نفسنا وفقدنا الأهل والمودة والرحمة وتكون حالنا هذه شبيه بالهوام التي لا تفقه شيئا وتكون الحياة عندنا مادية بحته واحد + واحد يساوي مليون بالتالي لا بتكون بينا لا مودة ولا رحمة بل تقاطع في الارحام وخصام وغيره . نحن يا رياح كان مفروض نأخذ الدنيا غلابا ولكن أخذناها بالتمني وأصبحت دي مصيبتنا الكبرى

سؤال أخير لكي ولي وللكل :
الان لو انا كنت بالوضع بتاع الهجرة ده ونويت اتزوج هل حا اتزوج من القرية ؟ وهل نفس الافتراض ده بيكون للبنت برضه حا تقبل تتزوج من ولد القرية ؟
ودمتم