منتديات عشاق السودان - عرض مشاركة واحدة

صعب أحب تاني · 21-06-2008, 12:18

المنظر الاول
يوم كنت راكبة حافلة امدرمان ماشة على البسطة...الحافلة وقفت في "الادارة" تنزل ركاب... انا كنت قاعدة جنب الشباك
وبعاين في بنت سمحة كانت واقفة في المحطة..كانت قاشرة أخر قشرة ولبسها ومكياجها ظابط وانيق... بس فجاءة وبدون
مقدمات ومراعاة للناس الواقفة،، البنت بصقت "بجوووووووووق" قدامها ... أأأأأخ المنظر صعب والحركة فظيعة شديدة
وما متوقعة منها... نحنا اتعودنا نشوف الاولاد "ما كلهم طبعا" بيعملوها وبرضو ما حركة حلوة بس تعملها بنت والله مصيبة وفضيحة...

المنظر التاني

الحافلة اتحركت وعبرت صينية" العرضة" ووقفت تاني... برضو كان في بنت واقفة "ما سمحة زي الأولى" بس حركتها أصعب..
كانت بتاكل في تسالي وخشمها وشلاليفها "شفايفها" ملياااااااااااانة قشر تسالي وهي ولا هاميها زول تاكل وتقشر وتعبي
في شلاليفها بالقشر ... والله البنت خربت شكلها وبقت بشعة شديد...

المنظر التالت

نزلت من الحافلة ووقفت عشان اقطع الزلط، جات مارة قدامي عربية فيها واحد.. طلع راسه بالشباك ودخل اصبعه "السبابة"
بين الشلوفة العليا والللثة وبحركة نصف دائرية وبحرفنة شديدة
وسرعة خيالية افرغ كل محتويات خشمه من تمباك "صعوط او سفة" والباقي مافي داعي ليه في الشارع وقدامي..!!
طبعا انا قطعتها في حشااي واستغفرت ربي وقطعت الشارع والله مأساة وقرف ما طبيعي... ما عارفة اقول دا عدم تحضر
ولا عدم ذوق ولا عدم احترام للمارة؟ بس اكيد التصرفات دي بتدل على تخلف ورجعية صاحبها...

ياريت ننتبه لتصرفاتنا وطريقة تعاملنا.. لان الشكل الظاهري للشخص بيجذبنا عشان نتعرف عليه أكتر ولو كان الواحد شكله
ما أوكي وما مهتم بنفسه اكيد حننفر ونبتعد منه...

الاحداث دي ما من نسج خيالي بالفعل هي حصلت معاي بنفس الطريقة والترتيب الذكرته

تحيااااااااااتي للكل