سافر طار أسراب اسراب
وزين وخريف بكاي وسحاب
سافر وخلى الحلة خراب
كان شتلاتو ملانة شباب
نديانة مفرهدة داب الداب
وكان النيل ساقيها تساب
رويانة ورامية ثمار ورضاب
أنا كنت زمان عاشق كبكاب
وكنت بسوي الحيلة سلام
وسؤال عن الأحوال وجواب
ورمية فنجان جبنة
مع ضل الكضاب
ودا كلو عشان السمحة
تجي ونتلاقي سلام أحباب
وتضحك بت الحاج حبوبة
شديدة وعارفة القصة
وعامله ليها عشانا حساب
ونشش بع في الونسات
الصافية صفا نياتنا
تزيد أشواقنا
مع الخطوات لي عند الباب
ويشلع نور قمراتنا
مع خديداتها الضوايات
أشوف الدمعة تسيل
حراقة بتحكي
سنين ريدنا الجايات
كأنها عارفة ثمارها الشايل
ما برجاني عشان أتخرج
ومن الغربة أجيك ونتم
فرح الأمات ..
حليل قمراتك في الحيشان
وحليل نجماتك ضووا ورحبوا بالضيفان
وحليلها شموسك في العصرية
بيقدلوا فيها كدي العرسان
وحليل شتلاتك حارسة جروفها
وقالدت النيل بالأحضان
وخدارها الفوق
وجداول شوق
وقلوب فاضن ملن الحيضان
.................
**********
&&&&&&&