منتديات عشاق السودان - عرض مشاركة واحدة

بنادول · 09-01-2008, 21:20

طبعا اخدت لي شاكوش قبل كم يوم دة كان مركز تركيزة جامدة خلتني اسكلب و أجقلب زي حبوبتي ( الله يطراها بالخير برضو ) لمان يجينا عم ( بتاع رسوم النفايات ) , طبعا شغلتا كمية من أغاني المدمرين و ( إحتسيت ) كمية مبالغة من لفافات التبغ , وعشتا الدبرسة ..
واحد صحبي ما قصر و كان كل يوم بديني كم ( دوز ) بتاعت ( سب - بورت ), و انا برضي ما قصرتا , عامل فيها بذاكر لي إمتحان يوم 16 الجاي دة كان ربنا حيانا .
الزهجة كابسة .. قررتا أمسك ( لاب - توبي ) و أحكي ليكم القصة دي ......
واحدة من الاغاني المشغلها كانت للمبدع أحمد المصطفى , عقد اللولي.. يا بت يا حلوة يا هولي ... الجنن عبد القادر , و أحبو و احب نوناتو .. نوناتو الفي وجناتو ( هناية كانت عندها نونات بي المناسبة ) ... ضحكتا طبعا و إتخيلتا نفسي عبد القادر دة , و قاشر بي ( شورت ) الجينز المقطع و مفلفل شعري ( مع أنو انا ما عندي شعر ) و و اقف في صينية العرضة الجنب الادارة المركزية ( بي إعتبار انو مافي مجانين بقيفو في الصواني غير في السودان . كان عشان السيناريو يكمل لازم اتخيل نفسي في السودان ) و قانص..
قانص دي اهم شي .. عشان جكس الاحفاد اغلبن بيجو بالشارع داك ( بي المناسبة تاني , هناية ما بتقرا في الاحفاد ) وقانص لي بنات الاحفاد بس ( ام درمان الاسلامية ما معانا ) عشان أكرهم ليك الشارع زاتو . وقاعد اعضي لي في غتا جردل أخدر لقيتو جنب باب حوادث مستشفى ام درمان ( الواحد الطب و المستشفيات ديل ساكنو حتى و هو مجنتر )
اثناء ما انا بعضعض كنتا بحاول اربط بين عبد القادر بتاع عقد اللولي و عبد القادر ( يا بوعلب ) بتاع الشاب خالد وصلتا لي قناعة..... انو ناس ( الجزاير ) ديل ظاتم عندهم ناس ( بتلحسو ) و ( يجنترو ) و ( يفطو سطر ) و إنو كلمة ( عبد القادر ) بقت مصطلح عالمي معترف بيهو من ( الدبليو إتش أووو ) يطلق على كل من تشوكش و ركب الصواني او اي واحدة من المعالم البارزة في بيئتو نتيجة ضغوطات عاتفية و نفسية مر بها المذكور بعد تجربة عاطفية فاشلة .
نرجع لي عبد القادر سيد اللسم .. الجننتو ( هولي ) وللا اسمها منو ديك
حسي يا ( هولي ) شكيتك لي منو أقول , الوليد قاعد في محلو .. تجيهم بي حتتم و برموشك كمان تديو تحية ؟ رموشك الينمعطن يا بركة النبي .
و عبد القادر المسيكين يشيل و يسكا من بيت لي بيت زي الشافع الرايح من امو .. و هولي تشيل و تميل
الما مذكور في الغنية ( حذفتو لجنة اللصوص الشعرية ) كوبليه سرد السبب ال ( جنن ) عبد القادر , عبد القادر اساسا عاتفي و رومانسي شويتين و دة المغتس حجرو , يعني من ما يشبك ليو في ( دامة ) بتخيلا مرتو على توول , و عندم بيت و شفع و ضاربين الاستغرار .. بعيش جوو ( جوِه للقادين عربي .. القادات ديل الله يكون في عونن )
الكوبليه الاصلي بقول...
مشيت لي هولي اصارح *** بي حبي الزاد و اتحكر
ردت بي كل صراحة *** كاشك بي كم بتقدر؟
لو ما عندك قوم اتخارج *** قبال اندهلك انور ( انور دة طبعا كاشااااااااات و عندو ركشة و شراني ما بتفاهم ).
قدورة عاش الدبرسة و كان في سؤال حاميهو النوم و كل ما يتكل راسو في العنقريب يفكر في البنية السؤال دة يزن ليهو...........

( هولي يعني شنو ؟ ؟؟؟)

و دة الجنن عبد القادر ....
و حيجنني انا ظاتو حسي ......