السلام عليكم اخترت الموضوع دا عشان ابدى بيه في المنتدى لاني حاسة انو في الفترة الحالية بقى موضوع مهم بالنسبة للبنات ويمكن بالنسبة للرجال لانو بقى مصدر اختلاف بين اي شخصين على وشك الزواج :
السؤال هو هل رقيص البنات يمارس حاليا او اصبح من اساسيات الزواج لانه عادات تحرص العائلات او الفتاة على تطبيقها ام انه مظهر من مظاهر التباهي والتفاخر من الفتاه واهلها يتنوع فيه الاهالي في طرق التباهي والتكلف. وعندي سؤال للشبان اذا ممكن، ممكن ترضى انو الفتاة اللي حتكون زوجة مستقبل ليك بانها ترقص ولو كان جوابك لا وكانت البنت مصرة على موقفها وحددت موافقتها على الارتباط بيك بموافقتك على انها ترقص حتكون ردة فعلك شنو ؟وسؤالي للبنات رايكم شنو في الرقيص ولو اتقدم ليك شاب عشان يتزوجك حتقترحي عليه فكرة انو ترقصي او حتفرضي عليه الفكرة وتربطيها بموافقتك عليه وممكن تخلي الفكرة دي هي الحاجز بينكم والسبب الرئيسي اللي ممكن يخليك ترفضي او تقبلي
على فكرة اا اخدت راي كتير من البنات في الموضوع دا وكانت اغلبية الردود بالرفض على قصة الرقيص منهم من قال انو العروس بتكون عاملة زي المهرج اللي بيطنطط من مكان لمكان والناس بيتفرجو عليه ومنهم من قال انو الحاجة دي بتجيب العين للبنت
بالنسبة لي انا ما موافقة على القصة دي لانو الرقيص دا كان عادة ابتدعوها حبوباتنا واجدادنا زمان واعتبروها عادات وتقاليد وغرسوها جوا البيوت لكن زمان كان الرقيص غير عن هسة لانو حاليا المفهوم اتغير والفكرة اتغيرت وكل اسرة وفتاة بقوا بيبدعو فيه ودا غير اللبس الخليع اللي ممكن تلبسو البنت عشان تظهر جسمها للناس وحتى لو كانو المتفرجات نساء دا ما بيمنع انو فيه عدم احترام لانو البنت بتكون شبه عارية واخيرا بتمنى اعرف رايكم في الموضوع دا ويبقى السؤال مطروح
زمان اجدادنا كانو ما متعلمين وما واعيين كفاية لما اوجدو العادة دي واحنا هسة اتعلمنا ودخلنا مدارس وجامعات الحل حيكون شنو ؟ بين جهل حبوباتنا وثقافة شبابنا عاداتنا وتقاليدنا اصبحت وين ؟