11-12-2007, 15:00
|
رقم المشاركة :
7 (permalink)
|
 معلومات العضو
|
|
|
|
إحصائية العضو
|
|
|
|
مشاركة: بلبل و بت الرياض .. مسلسل في حلقات
الحلقة الرابعة
ظل البلولة مقهيا في تلكم الحروف التي خطتها ضربات بت الرياض على الكي بورد... و سرح
سرح سرحة كبييييييييرة متخيلا نفسه خالطا بت الرياض في إحدى المساطب الممتدة عى طول شارع النيل في الخرطوم و الدنيا مغربية... و السمش .. نعم السمش و ليس الشمش أو الشمس... تحضن قصر الصداقة بي بواقي أشعتها الذهبية و تخضب باك جراوند توتي باللون الأحمر.... بحثا كثيرا في سرحته تلك عن نجيلة يقطعها و هو ينضم معها , مرت بمخيلته كل كلمات الحنان و التحنيك و الكلام الدقاق البجيب راس الجكس .. و لوح بيده هاشا الجمتي الذى بدأ يعكر عليه صفو خلطته... تخيلها بعينيها الواسعتين الما فيهن قضى .. تفحصها من ساسها لي راسا.. و أكتر شي ريحو إنو رجلينا ما مشققة.. البلولة بكره الكرعين المشققة و وسخانة .. كمان بكره البنات البكوشو كوشك كوشك بي كرعينهم , و يكره النقة و بحب المنقة .. بالزات المنقة الهندية عشان بتزكرو أيامات بدك من المدرسة عشان يلحق فلم حداشرالهندي في قصر الشباب و الأطفال , بعد ما يكونو زبطو البوش عند عمر في بانت .. تخيلها تمشى الهوينا ناحيته قاطعة شارع الزلط .. و هي تتلفت كغنماية ناس عشوشة بت خادم الدار حتى لا تطقشها عربية و نبقى في حوادث الخرطوم و اورنيك تمنية و أعملو لينا أشعة مقطعية بي خمسمية ألف مع كسر اللام .. مد يده مصافحا لها و مدت يدها الناااااااعمة و بيضا لتسلم عليه .. و قعدا سويا , حكى ليها عن التور السكاهم يوم طهور أخوهو النعمة .. و كيف إنو مهدي ود مكة المشهور بي إنو مانع هجر التور و جرا كزلقو و جخخخخخخخ ضبح التور .. ياااا عمك , نده البلولة مناديا بتاع الترمس و أدخل يده في السديري البرتقالي مخرجااربعمية جنيه , متين حديدة واحدة و حديدتين مية و أعطاها له و شال كيس ترمس و مناديل ورق كارمن.. وقال بي المرة كدة يديها سفة عشان يوري بت الرياض إنو بيعرف يتحنكش و يمسك الصعود بي المناديل يعني نظام الود بيقرف .. و أسهب معها في قصص ناس حلتم و مغامرات الطفولة و التشعلق في الباصات عشان يزوغو من دفع التعريفة و......
يا خينا الساعة الإنتا ماخدة كملت , حتقوم من الجهاز و للا تاخد ساعة تانية .. قال بتاع محل النت للبلولة الذي إنتفض مذعورا بعد أن صحاهو الهطلة دة من حلم زلوطي جميل و قال : ساعة تانية ( بي قرف ) و إستعدل في قعدتو و قرب من الكي بورد ....
Bolbol says :
معاك يا بت الرياض
يـــتـــبـــع
| التوقيع |
|
أديـــــــــــــها صنة ... أديــــــــــــــها بنادول
|
التعديل الأخير تم بواسطة : بنادول بتاريخ 11-12-2007 الساعة 15:02.
|
|
|