معلومات العضو

arsenal_1983 عضو جديد

إحصائية الترشيح

عدد النقاط : 10

 

 

لا اله الا الله الهند يا ساتر أعوذ بالله من غضب الله ومن الشباته والركشات ، يا ستى انا قعدت تلاته سنوات فى الهند وبالذات فى حيدر اباد درست جامعه هناك وخلى موضوع الجامعة دى ساكت ، كانت مشاكلنا بالهبل بتصل السفاره لين ما طفشنا السفير، وعلى فكره حيدر اباد كانت بلد كويسة قبل اربع سنوات لما كنا بنتعد بالاصابع اما الحين فحدث ولا حرج العطلة السودانيين مالين البلد يعنى لما تمشى تاخد ليك بيت(دا لو لقيتى اصلا بكترة السودانيين) حتلقى جيرانك كلهم ما شاء الله شباب سودانيين عطلة ما عندهم اى شغلة بس حولو العطلة جمب ستات الشاى وعمود الاناره بهناك ، الليل كلو سهر النهار كلو نوم ، كلهم متعطلين بمزاج منتظرين المية وخمسين ولا المئتين دولار مصاريف الشهر، المهم البلد ديك والله منحوس ومسكون كمان والهنود المبهدلين بى جاى وارخص ناس بهناك يا زول عندهم قرون بوروك عرض وماعندهم اى ثقافة للدول التانية يمكن يعرفو ليك امريكا ودبى والسعودية ، ما بيعرفو غير بلدهم حتى التلفزيون ما بتشوف غير القنوات الهندية عندهم كيبل بيجيب زى كم وتسعين كدا كلها قنوات هندية،حتى ديجيتال وريسيفرات مافى لو عايز تغير، أما موضوع الكورس ومعهد زووم دا خلى ساكت يا ستى انا ما درست عندهم لانى ما اقتنعت بيهم،لكن بعرف المعهد ومشيتو كم مره مع صحبى كان بيدرس هناك يا ستى اتخيلى بيخلصو ليك ال ام سى اس اى كلو فى 45 يوم بس هههه يعنى بتطلعى مش مسطحة يا زول الله يعينك بس وفى كمية سودانيين درسو هناك ما فى زول طلع بى حاجه كلهم امتحنو ليك ال ام سى اس اى بالتست كينغ سالكت وراسهم فاضى ، ومرات ناس زووم ديل بيدوك كوكتيل عجيب بيلمو ليك ( ال ام سى اس اى وال سى سى ان ايه واللينكس ريد هات و سولارى وصيانه ) ودا كلو بى 7.500 روبيه او اقل لو حنكك تقيل ما يعادل يمكن 150 الى 175 دولار ، بالنسبة لللينكس فى معهد بارتنر للريد هات فى امريكا لكن كانو منعوا الامتحانات الانلاين بالنسبه للسودانيين من امريكا حسع ما عارف لانى حسع بر الهند والحمد لله والله ما صدقت لما طلعت من هناك وعلى فكره حيدر اباد احسن مدينة فى الهند فى النظافة وفى الهدوء مش زحمة وغالية زى دلهى ومومباى وبانغلور او حتى مدراس السخانة والرطوبة وكمان نسبة المسلمين كتيره فى حيدراباد ، لكن الهند كدا عامة منحوسة وانا نادم لى حسع وللابد انى مشيت البلد ديك ، وحسع اليوم صحبى الكان ساكن معاى فى البيت كنت بتكلم معاهو بالتلفون قال لى قرفان وما عارف كيف يطلع من هناك.

بالنسبه للاراكل فى معهد محترم وممكن تمتحنى انلاين اسمو ( اس كيو ال ستار) برضو فى حيدر اباد لكن معهد ممتاز ودراسة جد بس داير مذاكره وبراكتس اليوم كلو عشان تطلع منهم بى حاجة.

المهم المشاكل هناك كتيره حتى ودعنا كم زول بحوادث بايكات وركشات ، والسودانيين يعجبوك طبعا دايرين يعملو نفسهم اسياد البلد بهناك خاشين كلو يوم فى مشاكل وبوليس وسجن والبوليس يتاعهم طبعا بيقيف ليك مع الهندى يرشو ليك الرطانه بتاعهتم ويقيفو ليك سوا، بعد دا الا رشاوى تقيله ، طبعا هناك امورك كلها بتقضيها بالرشاوى خاصة لما تسوى الاقامة.

فى النهاية ما بنصحك تمشى الهند،احسن تشوف ليكى مكان تانى او تدرسى فى السودان وتمتحنى انلاين فى مصر او اى مكان اذا الانلاين مافيش فى السودان.

المهم لو عايزة اى استفسار تانى نحنا حاضرين