|
مشاركة: سبعة سبعة ألفين وسبعة الساعة سبعة..!!
بحاول من الساعة سبعة إلا سبعة وعشرين دقيقة اخش على المنتدى ..وكل الأرقام الأنا حافظها صم .. والكلمات التذكيرية ..وكلمات المرور اللي بستخدمها ..هنا ..وهناك ..وفي كل فجة ..أبت تتقبل ..!!!
يا ربي المشكلة جات في المنتدى ..!!
ولا فيني ..!!
والخيال يودي ويجيب .. يا ربي حماده طلع ( طابور أمريكي ) و طارق ده زمان مسكنا منه ( كوفي عنان ) ده بالعافية تاني قبل على الكوري اللسة ما قادرين نحفظ إسمه ده ولا شنو ..!!
ناس إيهاب ..والصدى ..و الصريح .. ديل يا ربي عملوا ليهم ( عمله ) والأمم المتحده ..حظرت تواجدهم في أي ( موقع ) واتحصرنا معاهم ولا الحكاية شنو ..!!
ست الكسرة دي يا ربي ركنها ده ( كتلت فيهو زول ) ..!!
ولا ناس الترجي جوا بالفكي بتاعهم ..!!
وبالغلط لبس نضارة ( عاشق هناء ) وبدل ما يقفلها على ناس عوض مجذوب قفلها على ناس هشام عوض .. وخلانا مصرجين !!
في زول كراعه ( تب ) ما خضراء ..يا ربي يكون دار جعل ..!!
ولا ممكن تكون ( عربية ) معتز زيزي ..اتشمشروا فيها لغاية ما قطعت بنزين في محطة ( تسجيل الدخول ) وخلتنا نحاحي زي ( ناس كده ) .. وما قادرين ( نلم فينا ولا فيهم ) ..!!
الحصل شنو .. مالها الساعة سبعة ..من يوم سبعة سبعة ..مشت بدون ما تترك أثر ..زيها وزي :
1/1/2001 و 2/2/2002 و 3/3/2003 و4/4/2004 و5/5/2005 و 6/6/2006 ..!!!
قعدت مع نفسي واتذكرت (د. محمد عبد الله الريح ) وكان بيتكلم عن نشرة 8 في الراديو ..وهي طبعاً نشرة مشهوره بإنه بيزيعوا فيها الميتين ..وهي في فترة كده كانت برنامج لي الناس البعيده عن بعض ..فينتظروها ( بفارغ الصبر ) ولا ( فارق الصبر ) ما عارف ..ولمن واحد ما يحضرها ويجي يسأل :
أها الليلة النشرة فيها خبر منو ؟؟
تجيهو الإجابة : والله النشرة الليلة بايخه مافيها جديد ..!!
(ده كلو عشان ما ذاعو فيها زول مات من الحلة أو الأهل والمعارف ) !!!
**
تخريمة ( جوه بيتنا ) :
بتذكر يوم كنا بنسمع نشرة 8 دي والمذيع قال توفيت الحاجة ( فاطمة علي إبراهيم ) وفجأة صرخت جدتي التي كانت تشاركنا الاستماع للنشرة وقالت : ( أي ليم مسي )..!!
يعني كنت قايله دي أنا ..!!
| التوقيع |
|
**
الشهداء أكرم منا جميعاً ..!!!
|
|