|
مشاركة: ركــــن صديقتنا ღ♥ღ Sit_Elkisra ღ♥ღ الخاص
خــلـعـــتـــــــــــونـــــــــــــــي!!!!!!!! خلعة الذين إنخلعوا.......
أستاذة رغد،،،،،،
أولا: أشـــكرك على اللفتة الحلوة منك التي أعتبرها هدية غالية علي جداً...
و ثانياً : ده تحذير للحيجو بوراي أصحاب أركان و كده ... طبعاً الزولة دي تلب كده ختت الموضوع ده و لزقتو ليك في المنتدى ... أنا جاية خاشة عصريات بعد حرب الحلل و البوابير و الصيجان يوم الجمعة... لقيتا ليك رسلت لي رسالة خاصة انو انا بقيت ست ركن... اعملوا حساااابكم
((دي عملة تسويها فيني يا مديرتنا عاد بالغتي))
-----------------------------
بما إنو براكم جبتوني جاي عندي حاجات كتيرة غايظاني في المنتدى حقوم أبدأ أتكلم فيها من أول مشاركة لي هنا في الركن...
مع إنو فكرة الركن دي صعبة شوية لكن كدي نقول ليكم الجاي ده بعداك بوريكم الكنتة الجاية شنو
-----------------------------
أولاً : يا حمادة فوريفر كلمتك عشرمية مرة إنو sponsered دي غيرها أتعبت لي مرارتي ياخ!!
ثانيا: كنت غايبة عن المنتدى لفترة ... لما جيت لقيت ليك الجماعة عفنوها ليك مع الرسايل الخاصة و ((ممنوع تداول الايميلات)) (( ممنوع تداول ارقام الهواتف))
الحاجة دي عندها معنى واحد...
((ممنوع الجكيس و كسير التلج في المنتدى))
معقولة بس!!!!!!
ثالثاً : جاتني فكرة إنو يكون البروفايل بتاع اي عضو في المنتدى فيهو نوع جنسه ؛؛؛ في كمية من الناس ألقابها لا تدل على إنو ذكر أم أنثى ... الحاجة دي بتعمل لبس للناس مافي منه لزوم...
أحسن حاجة تعملوا تصويت بيناتكم يالمدراء و تشوفوا إذا فكرتي دي كويسة والا لا...
وانا شايفة من وجهة نظري إنو مافي مشكلة لو عرفناك ذكر والا أنثى... عاجلاً أم آجلاً العضو البيشارك حيتعرف جنسه شنو من صيغة حديثه!!
ما معروف إمكن ناس زيستي لي قدام يطالبونا بي صور كمان!!! ؛)
رابعاً : وين المنتدى بتاع التبادل التجاري ...؟ انا طبعاً ما مواكبة للأسف لكن كان المنتدى ده عامل شغل جامد ... سبب حذفه شنو؟ وإذا سؤالي مافي محله .. أعتذر و أسحبه
خامساً : في موضة بتاعت تثبيت و منتديات فرعية نحن في غني عنها ... على سبيل التحديد ؛؛؛ في تثبيت كمية كده كان اتكلمت مع أحد المشرفين فيهو و انو في مواضيع مرصعة بالنجوم و أخدت شعبية ما بطالة ... الحل في رأيي حيكون في النقطة الجاية (سادساً) أما عن الفرعية ... زمان لما كان المنتدى الأدبي واحد بيضم كل فنون الأدب و اللغات كان ماشاء الله .. بعد ما بقى في منتديين أدبي+قصص و خواطر و بتاع... المنتدى الأدبي فقد نكهته صراحة ...
بعدين المسمى ذاتو غلط .. إذا انت فصلت في المنتدى الأخير و شملت الأدب في الأول ؛؛؛ إذا جاك زول مسكين زي حلاتي و داير يشارك بتحير بي الله واحد...
فكرتي إنو يكون منتدى واحد و ((الأدب)) بشمل أي شي
أو يكونوا إتنين ((بي راحتكم)) بس المسمى بتاع الأدبي يكون الشعري...
منتدى الأخبار و القضايا الساخنة... أخبار و أرشيف أخبار و هلم جراًً...
برضو نفس الفكرة ؛؛؛؛ عشان ما ارغي كتير...
سادساً : زي ما وعدتكم في النقطة السابقة انو حقولليكم حل المشكلة في انكم تختوا المواضيع ام دبابير في روائع عشاق السودان و تخلصوا .. لكن بعد ما يتقفل و مافي زول يشارك فيهو ... مع الإشارة للمنتدى الكان موضوع فيهو..
سابعاً : طبعاً انا في الشبكات و شغل الإنترنت زي عامة الشعب بعرف البحتاج ليهو ... فعندي فكرة و ما عارفة تبعاتها المادية و القانونية شنو في عالم الإنترنت...
الفكرة هي: لو عملتو محرك بحث كيف معاكم... بحث داخل المنتدى و بحث في القوقل أو ياهو أو مواقع الصحف السودانية أو أي جهة تعملوا معاها التعاقد...
أرجو إنكم تفيدوني بي خبرتكم في الإقتراح ده لو سمحتو....
ثامناً : دايرين لينا فكرة مؤتمر بيتكلم عن قضايا الشباب؛؛؛ ناس التلفزيون و الروادي دي ما عاجبيني في طريقة بحثهم و نقاشهم حتى آراؤهم في القضايا بتاعتنا... ياخ انحن تعبانين و عينا دي مرقت
الفكرة : مؤتمر شباب ...
المضمون : ممكن يكون عن؛؛؛؛؛؛
الأكاديميات في الجامعات وفرص البعثات الخارجية
صناديق دعم الطلبة و تأثيرها
العطالة و فرص العمل
و ممكن كمان نتكلم ععنهن كلهن في مؤتمر واحد ... و لو الناس هنا عندها إضافات يا سلام
التمويل : عارفاكم يا زيستي و حمادة دايرين تقلعوا نعلاتكم و تجوني بالدرب... لكن اقولليكم شي الله يخليهن لينا الإذاعات الكتار ديل ... أي واحدة سوا ليها إعلان قدر الضربة في المنتدى عشان التمويل يجي تمام...
الكادر : ماشاء الله المنتدى فيهو مجموعة طيبة من الإداريين و المشرفين..
المكان الزمان الباقي يعني: ده بقى لما توافقوا و تتفقوا...
ده المتذكراهو و قاعد لي في طرف لساني... لو في أي شي خطر لي على بالي في غضون الأسبوع ده بجي بقولو...
وبما إنو أنا هسع قاعدة في منصة المنتدى العام بقول لي ناس المنتدى ...
(( سلام إزيكم كيف تمام؟ ))
-------------------
لما أجي تاني
|