مشكور اخونا سيدون وصفت الحال . المشكلة ان اهلنا الطيبين ما بتقدر تنظم وقتك معاهم في البلد دي ، الواحد يطلع خاتي في راسه كم موضوع ينجزهم خلال اليوم ، تبدا المعاكسات معاه من البيت لي المواصلات ( تأخير في تأخير) ، وياريت كان وقفت علي كدا تصل المنطقة المفروض تنجز فيها موضوعك ( ويا حلاوة كان المنطقة دي طلعت مصلحة حكومية - ضرائب ، ولا جوازات - وياسلام كان طلعت منسقية الخدمة الالزامية ) جرجرة بالطريقة الصاح .
تمشي لي فلان العلاني يوقول ليك الموضوع دا تبع مكتب علان الفرتكاني ، تمشي للزول القالوه تلاقاهوا في مكتبوا ما موجود ، تسأل عنوه ((تسوي شنو ما انت صاحب الوجعه)) يقولوا ليك موجود بس بكون around وكدا دا كان لقيت ليك ود حلال رد عليك ، وصاحبك يكون زايغ زوغة غريبة ، المهم تنتظر وتنتظر لي قريب نهاية الدوام يجيك البطل طاير ، يا أخونا الله جابك يعاين ليك كدا يقول ليك وين انت ما جيت من بدري مالك (وانت المسكين تكون جيت قبال الفراش ) ويقوم ياعين لموضوعك كدا ويقول ليك في حاجة ناقصها تمها وتعال بكرة ، والضحك يشرطك ، ويكون يومك ما انجزت فيه موضوع واحد خليك من اللسته الطويلة الكنت مأمل انك تنجزها خلال اليوم .
غايتو ربك يهون ، ويدينا ويديهم العافية.