منتديات عشاق السودان - عرض مشاركة واحدة

sidon · 19-06-2007, 16:10

من ناحية انه البرنامج يصيب بالهترشه؟؟؟ داكلام صاح
الموضوع ياأعضاء انه الواحد بقى يمشي مدنقر زي تقول زالينو... من تصحى الصباح تحك في عينك تخلعك الماسوره وتحبطك بأنغامها الجميله (اخ خ خ خ) زي البتقوليك انا لسه نايمه جليني يافرده. تقوليها تمام ياست الماسوره اشوف المكوى اطرح لي قميص وبنطلون واجي راجع ليك .تجي لعمو المكوى تحنسو وتهرشو عشان ترفع ضغطو وبالتالي ترفع حرارتو وفجأه كده يسخن. بكل بساطه يعاين ليك في عيونك ويقوليك يافرده اجري الدكان شوفليك فحمات ورجع مكوى الفحم الطلعتو معاش زماااااااان...
قول حماتك بتحبك والكهربه جات تلقى روحك في ((دقيقتين)) زي ((أندومي)) استحميت وكويت وشربت الشاي ويامواصلات جاك احد المجاهدين. احي انا من المواصلات يجيك الشفت طاير من بعيد رفعت يدك يهدن الكمساري فجأه يلمح شيت ولا كتاب في يدك : يامعلم دا طالب طالب طوالي ياأسطه ماناقصين غلبه من الصباح. وانت تكون فقط أتغبرت. تاني تجي شاخطه فيك حافلتين من النوع دا تكون كثافتك جات تتلفت يمين شمال تناجي روحك ""انا الجابرني شنو"" ترجع البيت زي الجاي راجع من المقابر تبيع اليوم كله وتستمر دوره الحياة في السودان...