|
مشاركة: بيت بكى .. ولا بيت حُكى !!
البكاء خشم بيوت ..!!
تعرف يا حبيب في ناس ( بيتأجروا ) عشان يبكوا ليك ( بكاك ) ..!!
وإنتهى زمن ( البكاء بيحرروا أهلوا ديك ) ..!!
وعندما تتحول صيوانات العزاء إلى منابر ( للفشخرة الفاضية ) و ( الخواء الفكري ) ينسى المتواجدين سبب تواجدهم ولربما حدث ما لايحمد عقباه ..!!
آخر ما سمعته عن تلك ( الصيوانات ) أنها صارت ( مجمعاً ) لمطاردي ( الوجبات الملح ) ..!!
يعني زي ما الشباب بتلقاهم قاعدين بيوصفوا لي بعض بيت عرس ( مرتقب ) فنانه ( حوته ) . و (الجكس )بتاعو جاي من ( بره) .. في جماعة بقت توصف لي بعض وتقول :
قال ليك المعمورة فيها بكاء كاااااااااارب ..وجباته جايه من الهيلتون ..!!
.. ولا تلقى واحد بيقول للتاني ( وهم قاعدين في نص الصيوان ) :
يا زول أبشر ..جماعتك ضابحين ليهم عجل للغداء الليلة ..!!
وعادي جداً تسمع ( سيد البكاء ) بيسال أهله .:
الناس ديل والله ما عرفتهم ديل ناس منوا ؟؟
وطبعاً الكبسيبة وقت الوجبات بتذكرك ( بالنهم العام ) وبتشوف الناس بتترصد ( الصينية المجهبظة ) وتتحكر جمبها .. والحاجة البيكونوا ما سمعوا بيها (ناس الكوضيم ) ديل .. قاعدة ( كل مما يليك ) ..عشان كده عادي جداً تلقى واحد بينقط ( صلصة المحشي ) في جلابية الزول القصادو مش الجمبو ..!!
والصيوان بيفضا مع مواعيد المسلسل .. والمباريات .. وقلم الكشف ( ده لو في كشف ) تلقاهو حايم يحلحل في الكلمات المتقاطعة وما بعيد تلقى زول ( لحسه ) وفات ..!!
والعيون ( الفارغة ) تلقاها تبحلق في الرقشة النزلت منو .. وفلانه ديك جات ( مكبرته ) ..وتوبها واقع منها !!
والمراهقين بيتصيدوا ( الفرصة ) اللي بتخليهم يدخلوا لبيت الفراش .. عشان ( الترامس ) فضت ..ولا الشاي خفيف ..ولا سكرو كتير ..والبال لا في الترمسة ولا في الشاي .. وكب كرب تسمع صوت الكبكبة وكسير الكبابي .. والماشي يجيب الثلج من ( الحمام ) تلقى رأسه زي مروحة التربيزة ..يتلفت يمين وشمال ..!!
والمرحوم هو البتنتهي علاقتهم بيهوا بانتهاء مراسم الدفن ..!!
**
برجع ليك ..عشان أشيل الفاتحة في حاجات تانية ...لو في العمر بقية ..!!
| التوقيع |
|
**
الشهداء أكرم منا جميعاً ..!!!
|
|